მერაბ დვალიშვილი – UFC-ის სუპერმსუბუქის წონის ჩემპიონი გახდა

15 სექტემბერი ქართულ საბრძოლო ხელოვნებაში ისტორიულ თარიღად ჩაიწერა. ნევადაში, ლას-ვეგასის Sphere-ში, UFC 306-ზე საჩემპიონო ბრძოლაში მერაბ დვალიშვილმა შონ ომალი დაამარცხა და სუპერ-მსუბუქი წონის საჩემპიონო ქამარი მოიპოვა. ქართველი მებრძოლი სფეროს დარბაზში ეროვნული სამოსით მივიდა.
მერაბ დვალიშვილი მეორე ქართველია, რომელმაც ორგანიზაციის საჩემპიონო ქამარი მოიპოვა. მას UFC-ში ზედიზედ 11 ბრძოლა აქვს მოგებული. მისი რეკორდი 18 გამარჯვებას და 4 მარცხს ითვლის. „ქართველი მანქანის“ – მერაბ დვალიშვილის გამარჯვებამ ქვეყანას მეორე ჩემპიონი აჩუქა. „ჩემი ცხოვრება ბრძოლაა ოცნებებისთვის!“ – ეს ქართველი სპორტსმენის სიტყვებია, რომლის გამარჯვებისაკენ მიმართულმა მუშტმა მთელი საქართველო გაახარა და გაამთლიანა. სპეციალურად ამ დღისთვის, გულშემატკივრებისთვის განსხვავებული გამოცდილების შესაქმნელად, ბრძოლა ფილარმონიის გარე ეკრანზე აჩვენეს. საჯარო ჩვენების მოწყობამ ქომაგები ერთ მუშტად შეკრა. ისინი საყვარელ მებრძოლს, თანამოაზრეებთან ერთად, შორიდან ამხნევებდნენ, შემდგომ კი გამარჯვების სიხარულს ერთმანეთს უზიარებდნენ.




